Қазақстанда коронавирус жұққан тағы 587 науқас анықталды, 245 адам жазылды
11 қарашада Қазақстанда 587 адамға коронавирус жұққаны тестпен расталды. Бір күнде 245 адам жазылды. Денсаулық сақтау министрлігінің 12 қараша таңертең таратқан хабарламасында осындай ақпарат жазылған.
Сәрсенбі күні Шығыс Қазақстан облысында - 231, Қостанай облысында - 57, Павлодар облысында - 49, Нұр-Сұлтанда - 47, Ақмола облысында - 35, Солтүстік Қазақстан облысында - 35, Алматы қаласында 30 адамнан коронавирус инфекциясы анықталған. Өткен тәулікте барлық қала мен облыста науқас тіркелген.
Наурыз айынан бері 118 491 адамға коронавирус жұққаны ПТР-тестпен расталған, содан бері 1911 адам коронавирустан қайтыс болған. 108 мың адам жазылған.
Бұл ресми мәліметке коронавирус жұққан бірақ арнайы комиссия "Covid-тен емес - ілеспе аурудан қайтыс болды" деп шешім шығарған жүздеген адам өлімі енгізілмеген. Жаз айларында өткен жылдармен салыстырғанда адам өлімі көп тіркелді.
Қазақстан билігі дүниежүзілік денсаулық сақтау ұйымының кеңесіне қарамастан коронавирус пневмониясына шалдыққандарды Covid статистикасына қоспай отыр. 1 тамыздан бері 39 357 адам коронавирус пневмониясына шалдыққан, 29 286 адам жазылған, 410 адам қайтыс болған.
Екеуін қоса есептегенде науқастар 157 848 адамға жетеді.
Қазір 7 мыңнан астам адам коронавирустан емделіп жатыр.
Мәскеуде карантин күшейтілді. Жаңа жылда мейрамханалар жабық болады
Жаңа жылға қараған түні Мәскеуде мейрамханалар жұмыс істемейді. Қалада мейрамхана, бар, клубтар түнгі сағат 23.00 мен таңертеңгі сағат 6 аралығында жабық болады. Жаңа талап бойынша, қоғамдық тамақтану орындарына залдың төрттен бір бөлігін ғана толтыруға рұқсат етілген, мәдени шараларға тыйым салынады. Студенттер қашықтан оқуға көшірілуі тиіс.
10 қарашада қала мэрі Сергей Собянин карантиннің күшейтілетінін хабарлады.
Көрермендері бар ірі шара өткізу үшін азаматтар немесе ұйымдар мэрия және Роспотребнадзордан рұқсат сұрауы керек. Балалар лагері, ойын-сауық орталықтарының жұмысы тоқтайды. Шектеу шаралары 13 қараша мен 15 қаңтар аралығында күшінде болады.
Собянин Мәскеуде коронавирус жұқтырғандар жылдам артып бара жатқандықтан осындай қатаң шара енгізуге мәжбүр екенін айтады. Оның сөзіне қарағанда, тұмау-сырқау кезеңі де қабаттасып жатқандықтан қалада ахуал онан сайын ушығуы мүмкін. Шектеу шаралары вирустың тарауын бәсеңдетуі тиіс.
6 қарашада Мәскеу мэрінің орынбасары Анастасия Ракова коронавирус жұқтырған науқастарға арналған орындардың 70 пайызы толып кеткенін хабарлаған еді. Қазан айында екі уақытша госпиталь ашылып, коронавирус жұқтырғандарға арналған стационарлар саны 4-ке жетсе де, қалада орын тапшылығы сезіле бастаған.
Ресми мәлімет бойынша, қазір Мәскеуде коронавирус жұқтырғандар 126 750 адамға жеткен. Статистика мамандары осыған дейін ресми мәліметтің азайтылып көрсетіп жатқанын айтқан.
Бір күнде 242 адамнан коронавирус пневмониясы анықталды
10 қарашада Қазақстанда 242 адамнан коронавирус пневмониясы анықталды, 83 адам жазылды, өткен тәулікте адам өлімі тіркелген жоқ.
Қазақстан билігі 1 тамыздан бастап коронавирусқа ұқсас пневмонияға бөлек код беріп, пневмонияның сол түріне шалдыққандарды бөлек есептеп келеді. Содан бері 39 357 адамнан коронавирус пневмониясы анықталған, 410 адам қайтыс болған, 29 286 адам жазылған.
Сейсенбі күні коронавирус жұққаны тестпен расталғандар арасында 6 адам өлімі тіркелген, наурыз айынан бері коронавирустан қайтыс болғандар саны 1911 адамға жетті. Елде коронавирус жұққаны тестпен дәлелденген 117 336 адам бар: 108 169-ы жазылған.
Қазір 7 606 адам коронавирустан емделіп жатыр, 2 926 адам стационарда ем қабылдап жатыр. 196 адамның жағдайы - ауыр, 25 адамның жағдайы - өте ауыр, 28 адам жасанды тыныс алу аппаратына қосылған.
Қазақстанның Covid бойынша ресми статистикасына коронавирус жұққан бірақ арнайы комиссия "Covid-тен емес - ілеспе аурудан қайтыс болды" деп шешім шығарған жүздеген адам өлімі енгізілмеген. Жаз айларында өткен жылдармен салыстырғанда адам өлімі көп тіркелді.
Соңғы аптада Қазақстанның бірқатар аймақтарында әсіресе, Ресеймен шекаралас аумақтарда карантин күшейіп, блокбекеттер қойылған. СҚО, БҚО, ШҚО, Павлодар, Қостанай облысы аумағына кіру үшін адамдарда коронавирус жұқпағанын дәлелдейтін ПТР-тест анықтамасы болуы керек.
ПІКІРЛЕР