29 қарашада коронавирустан 7 адам қайтыс болды
29 қарашада Қазақстанда 43 адамнан коронавирус пневмониясы анықталды, 41 науқас жазылды. Бір тәулік ішінде пневмонияның бұл түрі бойынша адам өлімі тіркелмеді.
1 тамыздан бері коронавирус пневмониясына шалдыққандар 42 147 адамға жеткен, 30 535-і жазылған, 443 адам қайтыс болған.
Жексенбі күні коронавирус жұққаны ПТР-тестпен дәлелденген науқастар арасында 7 адам өлімі тіркелді. Наурыз айынан бері 2034 адам қайтыс болды. Өлім-жітімді зерттеу комиссиясы олардың өліміне "коронавирус" себеп болғанын айтады.
Елде коронавирус жұқтырғандар мен "пневмонияға" шалдыққандар 173 806 адамға жеткен. Бірақ коронавирус пневмониясына шалдыққандар есебі Қазақстанның Covid статистикасына енгізілмеген.
Денсаулық сақтау министрлігі аймақтағы "пневмония" ахуалы жайлы мәліметті сирек жариялайды.
Қазір коронавирус инфекциясынан – 13 мың адам, коронавирус пневмониясынан 11 мыңға жуық адам емделіп жатыр. Коронавирус жұққаны тестпен расталғандар арасында 222 адамның жағдайы – ауыр, 31 адамның халі – өте ауыр, 33 адам тыныс алу аппаратына қосылған.
Көптеген сарапшылар Қазақстанда коронавирус жұқтырғандар ресми мәліметте көрсетілген саннан әлдеқайда көп деп санайды.
Бір күнде коронавирус жұққан 794 науқас анықталды, 274 адам жазылды
30 қарашада Қазақстанда коронавирус жұққаны арнайы тестпен расталған 794 адам анықталды. Бір күнде 274 адам жазылды.
Денсаулық сақтау министрлігінің ақпараты бойынша, жексенбі күні ең көп науқас Шығыс Қазақстан облысы (125) мен Павлодар облысында (121) тіркелген. Солтүстік Қазақстан облысында - 108, Ақмола облысында – 91, Қостанай облысында – 87, Алматы қаласында – 70, Нұр-Сұлтанда – 54, Батыс Қазақстан облысында 44 адамнан коронавирус анықталған. Өткен тәулікте Қызылорда облысында науқас тіркелмеген.
Наурыз айынан бері коронавирус жұққаны тестпен дәлелденгендер 131 659 адамға жетті: 116 мыңнан астамы жазылған, 2020-ы қайтыс болған.
Қазақстанның коронавирус статистикасына коронавирус пневмониясына шалдыққандар есебі енгізілмеген. 1 тамыздан бері 41 940 адамға коронавирус пневмониясы диагнозы қойылған, 440 адам қайтыс болған, 30 мыңнан астамы жазылған.
Бұған қоса, коронавирус статистикасына Covid жұққан, бірақ "ілеспе аурудан қайтыс болды" делінген жүздеген адам өлімі де енгізілмеген.
Кейбір мамандар Қазақстанның ресми орындары таратқан коронавирус мәліметке күмәнмен қарайды.
Еуропада Covid-тен өлгендер 400 мыңнан асты, АҚШ-та бір айда 4 млн науқас тіркелді
28 қараша күні Еуропада коронавирустан қайтыс болғандар саны 400 мыңнан асты. Пандемия басталғалы сегіз ай өтсе, осы аралықта Еуропада Covid ауруынан 400 949 адамның өлімі тіркелген. Бұл туралы Аурудың алдын алу және қадағалау жөніндегі еуропалық орталық хабарлады. Коронавирус инфекциясын жұқтырып қайтыс болғандар жөнінен көш басында Ұлыбритания (57 551), Италия (53 677), Франция (51 914), Испания (44 668) және Ресей (39 068) тұр.
Вирус жұқтырғандар саны 13 миллионнан асқан АҚШ-та тек қараша айының өзінде 4 миллион Covid науқасы анықталған. Айдың аяқталуына әлі екі күн бар. Бұл – қазан айындағы рекордтан екі есе жоғары көрсеткіш. Елде орташа есеппен күніне 1,5 мыңға жуық адам коронавирустан көз жұмып жатыр. Қайтыс болғандардың жалпы саны 266 мыңнан асып қалды. Ауруханаға жатқызылғандар саны алғаш рет 90 мыңнан асты. Бұл көптеген штатты шектеу шараларын күшейтуге мәжбүрледі.
"Біз апатқа жақындап келеміз" деді CNN-ге Джордж Вашингтон университетінің шақырылған профессоры Леана Вен. "АҚШ-та қайтыс болатындардың тәулік саны жуық арады 2 мыңнан, бәлкім 3 мыңнан, 4 мыңнан асуы мүмкін".
Ресейдің Санкт-Петербург қаласында жаңа туған нәрестенің әке де, шешесі де коронавирустан қайтыс болып, отбасынан тұтас айырылған. Жасанды тыныс алу аппаратына қосылған әйел босанған күні көз жұмған. Ал сәбидің әкесі одан үш күн бұрын қайтыс болған. Ресейде індет басталғалы 2 миллион 249 мың адамның вирус жұқтырғаны расталған. Оның 39 мыңнан астамы қайтыс болған, 1 миллион 746 мыңы жазылып шыққан.
Қазақстанда ПТР тестімен расталған коронавируспен екінші күн қатарынан 826 науқас тіркелді
28 қараша күні Қазақстанда ПТР тестімен расталған коронавирус ауруымен 826 науқас тіркелді. Бұл туралы Covid инфекциясын таратпау жөніндегі ведомствоаралық комиссия хабарлады. Науқастардың төрттен үшін елдің солтүстік және шығыс бөлігіндегі аймақтардың үлесінде.
Covid науқастарының жалпы саны жөнінен санаулы күн бұрын бірінші орынға шыққан Шығыс Қазақстан облысында коронавирусты тағы 145 адамның жұқтырғаны анықталып отыр. Күз басталғалы аймақтар бойынша көш бастап келген бұл облыста 28 қазаннан бастап күнделік анықталатын науқастар үш таңбалы санмен белгіленді. Оған дейін ауруға шалдыққандардың тәулік көрсеткіші 30-дан аспаған.
Павлодар облысында 120, Солтүстік Қазақстан облысында 105 адам Covid жұқтырғандар қатарына қосылды. Одан кейінгі орындарда Ақмола облысы (86), Қостанай облысы (85) және Нұр-Сұлтан қаласы (83).
Түркістан облысында 2, Ақтөбе және Қызылорда облыстарында 1 науқастан тіркелген.
Қалған аймақтардағы жағдай мынадай:
Алматы қаласы – 73
Шымкент қаласы – 6
Алматы облысы – 33
Атырау облысы – 18
Жамбыл облысы – 14
Батыс Қазақстан облысы – 39
Қарағанды облысы – 25
Елде вирус жұқтырғандар барлығы 130 865 адамға жетті. Оның ішінде 116 187 адам аурудан айығып үлгерген. 28 қарашадағы ресми мәлімет бойынша, Covid ауруынан барлығы 2020 адам қайтыс болған. Бұл статистикаға коронавирус жұқтырғаны расталған, бірақ "ілеспе аурудан қайтыс болды" деген жүздеген адам кірмеген.
Covid жөніндегі ұлттық статистикаға коронавирус пневмониясына шалдыққандар қосылмай отыр. Есебі 1 тамыздан бері жүргізіліп келе жатқан бұл ауруға 28 қарашаға дейін барлығы 41 940 адам шалдыққан. Оның ішінде 440 адам аурудан айыға алмай қайтыс болған.
ПІКІРЛЕР