Бір күнде коронавируспен 1342 науқас тіркелді. Жартысынан астамы солтүстік өңірлердің үлесінде
30 қаңтар күні Қазақстанда 1342 адам коронавирус инфекциясымен тіркелді. Оның 763-і солтүстік өңірлердің үлесінде.
Елдің солтүстігінде орналасқан Павлодар (252), Қостанай (102), Ақмола (201) және Солтүстік Қазақстан (96) облыстарында және солтүстікке жақын Нұр-Сұлтан (112) қалаларында тіркелген науқастар саны салыстырмалы түрде жоғары.
Алматы қаласында тәулік ішінде 115 науқас анықталған.
Оңтүстік өңірлерде және батыс Қазақстанның Маңғыстау, Ақтөбе облыстарында күнделік тіркелетін науқастар саны әдеттегідей төмен деңгейде. Жамбыл облысында 24, Шымкент қаласында 15 науқас, Түркістан облысында 12, Қызылорда облысында 6, Ақтөбе облысында 18, Маңғыстау облысында 13 науқасы анықталған.
Ауруға осыған дейін шалдыққандар арасында бір күнде 867 адам жазылып шыққан.
Осылайша, індет басталғалы Қазақстанда барлығы 186 711 адамның коронавирус инфекциясын жұқтырғаны расталып отыр. Оның 167 914-і жазылып шыққан. 30 қаңтардағы ресми деректе вирус жұқтырғаны ПТР тестімен расталған науқастар арасында 2535 адам коронавируспен қайтыс болды деп көрсетілген. Бұған коронавирус жұқтырғаны расталған, бірақ "ілеспе аурудан қайтыс болды" деген жүздеген адам кірмей қалған.
Қазақстан үкіметі 1 тамыздан бері коронавирус жұқтырғаны ПТР тестімен расталмаған, диагнозы ауру белгілері бойынша қойылған коронавирус пневмониясының есебін жүргізіп отыр. 30 қаңтардағы дерекке қарағанда, пневмонияның бұл түрі былтырғы тамыздан бері 47 787 адамнан анықталған. Оның 566-сы қайтыс болған.
Қазақстанда 27 403 адам коронавирус пен соған ұқсас пневмониядан емделіп жатыр
Өткен тәулікте Қазақстанда коронавирус дерті лабораторияда дәлелденген 1 370 науқас тіркелді. Бұл жөнінде денсаулық сақтау министрлігінің ресми сайты хабарлады. Мекеме мәліметі бойынша, 28 қаңтарда симптомдары Covid-қа ұқсас "пневмониямен" ауырған 70 адам санаққа алынған. Жұмада коронавирустан 8 адам көз жұмса, бейсенбіде "ковидқа ұқсас пневмониядан" 2 кісі қайтыс болған.
Министрлік "коронавирусқа ұқсас пневмония" статистикасын бір күн кешіктіріп жариялайды. Оның үстіне, мекеме бұл дертке шалдыққандардың аймақтар бойынша мәліметін бермейді, тек республикадағы жалпы көрсеткішпен шектеледі.
Соңғы тәулікте коронавирус инфекциясынан 1452 науқас жазылып шыққан.
Covid-ті жаңа жұқтырғандар көрсеткіші бойынша Павлодар облысы алда келеді. Мұнда бір тәулікте бұл инфекциямен 267 адам тіркелген. Жұма күні аймақтың бас санитар дәрігері мұнда індеттің өршуіне байланысты бірнеше ауданда кемі екі аптаға 20 санитарлық пост қойылатынын мәлімдеді. Жыл басынан бері өңірде коронавирус жұқтырған 4 мыңдай адам тіркелген.
Соңғы мәлімет бойынша індет ең жылдам тарап жатқан "қызыл аймаққа" кірген Нұр-Сұлтанда - 139, Алматыда – 90 адам коронавирус жұқтырған.
Өткен тәулікте науқас ең көп тіркелген аймақтар — Ақмола (205 адам) және Павлодар (267 адам) облыстары.
Солтүстік Қазақстанда — 115, Қостанайда — 110, Батыс Қазақстанда — 91, Алматы облысында — 83, Қарағанды облысында — 81, ШҚО — 67, Атырау облысында — 31, Жамбыл облысында — 27, Түркістан облысында — 19, Шымкент қаласында — 17, Қызылорда және Маңғыстау облыстарында — 11 адамнан, Ақтөбе облысында — 6 адам Covid жұқтырып, тіркеуге алынды.
Былтырғы наурыздан бергі мәлімет бойынша, Қазақстанда жалпы 185 369 адам коронавируспен, 47 787 адам соған ұқсас пневмониямен есепке алынған. 3 101 адам көз жұмған. Кей әлеуметтанушылар мен медицина қызметкерлерінің айтуынша, коронавируспен ауырғандар саны бұдан әлдеқайда көп болуы мүмкін.
Ресми мәлімет бойынша, осы күні коронавирус инфекциясы дәлелденген, дәлелденбеген адамдарды қоса есептегенде 27 403 адам емделіп жатыр. Олардың ішінде 6 430 кісі стационарда. 265 адамның жағдайы ауыр, 61 пациенттің жағдайы өте ауыр, 43 науқас жасанды тыныс аппаратына қосылған.
Janssen мен Novavax вакцинасы сынақта жоғары тиімділік көрсетті. Екі екпе жайлы не белгілі?
Бельгиялық Janssen (Johnson & Johnson брендіне тиесілі) компаниясы жасап жатқан коронавирусқа қарсы екпесінің бір дозасы сынақ кезінде 66 пайыз тиімділік көрсеткен. Бұл туралы 29 қаңтарда компания хабарлады.
Janssen фармацевтикалық компаниясының мәліметінше, халықаралық сынаққа қатысқан 44 мыңдай адамның ішінде ешкім ауруханаға түспеген, қайтыс болғандар да жоқ. Сынаққа қатысқан 468 адамға вирус жұққан.
Компания екпенің бір дозасының өзі коронавирустан жақсы қорғайды деп мәлімдеді. Қазір Janssen екі дозаның қаншалықты тиімді болатынын тексеріп жатыр. Бірақ бұл вакцина Оңтүстік Африка мутациясына қарсы тиімділігі сәл төмен – 57 пайыз.
Janssen биыл бір миллиард доза шығаруды жоспарлап отыр. АҚШ бұл компанияға алдын ала 100 миллион дозаға, Канада 38 миллион дозаға, Ұлыбритания 30 миллион дозаға тапсырыс беріп қойған.
29 қаңтарда АҚШ-тың Novavax компаниясы дайындап жатқан екпесінің Ұлыбританиядағы сынағы 89,3 пайыз тиімділік көрсеткенін мәлімдеді. Сынақтың үш кезеңінен кейін бұл екпе вирустың ұлыбританиялық мутациясынан да қорғай алатынын көрсеткен. Үшінші сынақ кезеңіне 18-84 жастағы 15 мың адам қатысқан. Сынақ екпесін алғандардың 27 пайызы – 65 жастан үлкен адамдар. Novavax екпесі екі дозадан тұрады. Бұл вакцина Оңтүстік Африка мутациясына қарсы 60 пайыз тиімділік көрсеткен.
Әлемде Janssen мен Novavax екпесі үшінші сынақ кезеңінен өтіп, нәтижесін ресми түрде жариялаған бес вакцинаның қатарына енді. Бұған дейін Pfizer/BioNTech (АҚШ/Германия), Moderna (АҚШ), Oxford/AstraZeneca (Ұлыбритания) екпелері сынақ кезінде жоғары тиімділік көрсеткен. Бұл үш екпе әлемнің біраз елінде, соның ішінде АҚШ пен Еуропада мақұлданып, халыққа салынып жатыр.
- Pfizer/BioNTech екпесінің тиімділігі 95 пайыз деп хабарланды. Екінші дозаны 21 күні салу керек. Вакцинаны -70 градуста сақтау керек. Бұл – екпенің ең үлкен минусы. Pfizer/BioNTech екпесін Дүниежүзілік денсаулық сақтау ұйымы мақұлдаған.
- Moderna вакцинасының тиімділігі 95 пайыз деп жарияланды. Екінші дозаны 28 күні салу қажет. Екпені -20 градуста 6 апта сақтауға болады.
- Oxford/AstraZeneca вакцинасының тиімділігі 62-90 пайыз деп жарияланды. Екінші дозаны 4-12 аптаның ішінде салу қажет. Екпені қолданыстағы тоңазытқышта, 2-8 градус салқында сақтау керек.
Бұдан бөлек, Ресейдің "Спутник V" екпесі де бірнеше елде халыққа жаппай салынып жатыр. Бұл вакцинаның үшінші сынақ кезеңінің нәтижесі жарияланбаған. Бірақ Ресей билігі желтоқсанда "Спутник V" екпесінің 92 пайыз тиімділік көрсеткенін хабарлаған. Қазақстан билігі 1 ақпаннан бастап халыққа "Спутник V" екпесін салмақ.
1500-ден астам адамнан коронавирус пен пневмония анықталды
Қазақстанда тағы 1469 адамның ПТР тесті оң шығып, коронавирус жұққаны белгілі болды деп хабарлады 29 қаңтарда таңертең денсаулық сақтау министрлігі. Тағы 59 адам коронавирусқа ұқсас пневмония түрімен ауырған.
Ресми мәлімет бойынша, 2020 жылдың наурыз айынан бері елде 183 999 адамның коронавирус тесті оң шыққан. 165 мыңнан астамы жазылған, 2557 адам (өткен тәулікте 6 адам өлімі тіркелген) қайтыс болған.
Денсаулық сақтау министрлігі 1 тамыздан бері пневмонияның коронавирусқа ұқсас түріне жеке код беріп, тіркеп келеді. Содан бері 47 717 адам коронавирус пневмониясына шалдықты деп айтылады. 564 адам содан қайтыс болған. 35 мыңнан астамы жазылған.
Джонс Хопкинс университетінің мәліметінше, әлемде коронавирус жұқтырғандар 101,4 миллион адамға жеткен, 55,9 адам жазылған, 2,18 млн адам қайтыс болған.
ПІКІРЛЕР