Ресей Киев телемұнарасын "Калибр" ракетасымен атқаны хабарланды
"Настоящее время" телеарнасының тілшісі Роман Сухан "украиналық әскерилер Киевтегі телемұнараға "Калибр" қанатты ракетадан шабуыл жасалғанын анықтады, мұндай екі ракета атылған" деді.
1 наурызда Ресей Киевтегі телемұнараға әуеден шабуылдап, кемі бес адам қаза тапқан еді.
Украина-Ресей келіссөзінің екінші раунды жайлы қазірге бар ақпарат мынау болып тұр:
Ресей президентінің баспасөз хатшысы Дмитрий Песков журналистерге "2 наурыз кешке таман Ресей делегациясы Украина өкілдерін келіссөзде күтеді" деді. Песков келіссөз қайда өтетінін айтпады.
Украина ішкі істер министрі Дмитрий Кулеба Ресеймен келіссөздің екінші раунды қашан өтетін білмеймін деп мәлімдеді.
Тоқаев пен Путин телефон арқылы сөйлесті
Қазақстан президені Қасым-Жомарт Тоқаев пен Ресей президенті Владимир Путин телефон арқылы сөйлескені хабарланды. Ақорда таратқан мәлімдемеде Тоқаев "Украина төңірегіндегі ахуалға қатысты келіссөздер барысында ортақ келісімге қол жеткізудің аса маңызды екенін атап өткені" деп жазылған.
"Мемлекет басшылары екі елдің экономикалық жағдайы мен сауда-экономикалық саладағы екіжақты ынтымақтастық жөніндегі мәселелерді талқылады" деп мәлімдеді Ақорда.
Ал Кремльдің баспасөз қызметі "Ресейдің Донбасстағы азаматтарды қорғау үшін жүргізіп жатқан арнайы операциясына қатысты жағдай талқыланды. Бұған қоса, Ресей мен Қазақстанның алдағы стратегиялық серіктестігі мен әртүрлі салалардағы қарым-қатынасы сөз болды" деп жазды.
Ресей қорғаныс министрлігі Херсонды басып алғанын мәлімдеді
Ресей әскері Украинаның Херсон қаласын басып алды. Сәрсенбі күні Ресей қорғаныс министрлігі осылай деп мәлімдеді. Украинаның оңтүстігіндегі облыс орталығында 300 мың адам тұрады.
Украина жағы қала Ресей әскеріне берілді деген мәліметті растамады. Қала мэрі Фейсбукте "біз әлі де Украинамыз" деп жазды.
Украинаның Херсон облысында ұрыстар 24 ақпанда басталған, келесі күні ресейлік жауынгерлер стратегиялық маңызды Антон көпіріне бақылау орнатты. 1 наурызда қала мэрі Игорь Колыхаев әкімшілік орталық қоршауда қалғанын, алайда украин билігінің бақылауында екенін мәлімдеді.
1 наурызда кешке Колыхаев Азаттық радиосының Украин қызметіне сұхбат беріп, қаланың қатты қирағанын, жауынгерлер мен бейбіт тұрғындар опат болғанын айтты. 2 наурызда таңертең ол қала тұрғындарынан көшеге шықпауын, атыспауын сұрады.
ПІКІРЛЕР