Spotify стриминг қызметі Кремльдің Украинадағы басқыншылық соғысы үшін Ресейдегі офисін "белгісіз уақытқа жапты". Бұл туралы компания өкілдеріне сілтей отырып Reuters агенттігі хабарлады.
Компанияның мәлімдеуінше, Ресей Украинаға басып кірген соң, Spotify Ресейден өзге елдер үшін Кремльге жақын Russia Today және Sputnik ақпарат құралдарының аккаунтын жапқан. Осыған ұқсас шараны бұған дейін Meta мен Twitter де қабылдаған.
Ресей тұрғындары Spotify қызметін бұдан әрі де қолдана алады. Алайда 2 наурыз күні стриминг қызметінің ақысын төлеуде қиындықтар бары, мәселенің Ресей банктерінің санкцияға түсуінен туғаны айтылды.
Германия ресейлік миллиардер Әлішер Османовтың яхтасын тартып алды
Германия билігі Гамбургте Еуроодақ санкциясына ілінген ресейлік миллиардер Әлішер Османовтың 156 метрлік яхтасын тұтқынға алды. Бұл жөнінде яхта кәсібімен айналысатын үш дереккөзге сүйенген Forbes сайты хабарлады.
"Дилбар" яхтасының құны – 600 млн доллар. Ол Гамбургтегі кеме құрастыратын Blohm+Voss зауытында былтырдан бері жөндеуде болған. Forbes дереккөзінің хабарлауынша, мүлікке тыйым салынғаннан кейін яхтаны жөндеушілер сәрсенбі күні жұмысқа шықпаған. Миллиардер өкілі әзірге түсініктеме бермеді.
Османовтың яхтасы 2016 жылы авторлық жоба бойынша құрастырылған. Оны салуға 5 жыл кеткен. Бұл су ығыстыруы жағынан (шамамен 16 мың тонна) әлемдегі ең ірі кеме. Онда бұрын-соңды яхталарда болмаған өте үлкен бассейн, екі тікұшақ қонатын алаң, сауна бар.
Ресейдің Украинаға басып кіруіне байланысты өзге ірі ресейлік бизнесмендермен бірге Османов та санкцияға ілінген. Forbes мәліметінше, ресейлік миллиардерлерге 32 мегаяхта тиесілі.
БҰҰ: Украинадан кеткен босқын саны миллионға жетті
Британиялық BBC-дің хабарлауынша, Украинадан кеткен босқындар саны 2015 жылғы миграциялық кризистің көрсеткішіне жуықтап қалған. Ол кезде Сирия мен Таяу Шығыстың өзге елдерінен 1,3 миллион босқын қашып шыққан. Бірақ бұл жолы осы көрсеткіш бір жылдың емес, бір аптаның ішінде орнап отыр.
Босқындар негізінен Польшаға қарай қашып жатыр. Осы күнге дейін ол елге 400 мың азамат өткен. Жүз мыңға жуығы Венгрияға, ондаған мыңы Словакия, Чехия, Румыния және Молдоваға кеткен.
БҰҰ сарапшыларының пікірінше, қазіргі соғыстың салдарынан Украинада 12 миллион адамға дейін босып кетуі мүмкін.
"Билік үнсіз, ал қарапайым халық соғысқа қарсы". Қазақстандықтар Украинаға көмек жіберіп жатыр
Қазақстан жұрты Украинаға материалдық көмек жөнелтіп жатыр. Бастамашыл топ өкілдері жиналған заттар мен қаржыны бүгін Украина елшілігі ғимаратына апарып тапсырды.
ПІКІРЛЕР