"Ұлымды соғысқа емес, әскерге жібердім". Украинада тұтқынға түскен ресейлік жауынгерлердің аналарының талабы
Ресей мен Украина арасындағы соғыста қолға түскен ресейлік жауынгерлердің аналары ұлдарының басқа елде тұтқында жатқанын интернетте тараған видеолардан білген. Олар Ресей билігі балаларын соғысқа жіберетінін жасырып, енді тұтқындағы жауынгерлерді босатып алуға құлықсыздық танытып отырғанын айтады. Ұлының тағдырына алаңдаған аналар қазір кімнен жәрдем сұрарын білмей, шарасыз күйде отыр.
Ресейдің Украинаға қарсы соғыс ашқанына бір аптадан асты. 2 наурызда Ресей қорғаныс министрлігі соғыс басталғалы алғаш рет өз әскеріндегі адам шығынын жариялап, 498 жауынгер қаза тауып, 1957 адам жараланғанын мәлімдеді. Украина билігі болса "Ресейдің 6 мыңға жуық сарбазының көзі жойылды" дейді.
Кейінгі кездері тұтқынға түскен ресейлік жауынгерлер туралы ақпараттар мен видеолар желіде көп тарай бастады. Олардың арасында Отан алдындағы борышын өтеуге кетіп, соғыс ортасынан бір-ақ шыққан өрімдей жас көп. Сибирь.Реалии сайты тұтқынға түскен жауынгерлердің аналарын тауып сөйлесті. Аналар мемлекеттің жастарды алдап, соғысқа жұмсағаны, Украинаға көзқарасы және ұлдарын елге қайтару үшін күресі туралы әңгімеледі.
Толығырақ Азаттық мақаласынан оқи отырыңыздар.
"Настоящее время" Ресей азаматтарына Украинадағы бейбіт елдімекендердің қалай бомбаланғанын бейнелейтін суреттерді көрсетті. Реакциясын көріңіз:
Индустрия министрлігі: Украинадан Қазақстанның 23 жүк көлігі шығарылды
"2022 жылғы 4 наурыздағы жағдай бойынша ҚР Индустрия және инфрақұрылымдық даму министрлігі, ҚР Сыртқы істер министрлігі және үшінші елдердің мемлекеттік органдарының көмегімен Украинадан 23 қазақстандық жүк көлігі шығарылды" делінген ҚР Индустрия және инфрақұрылымдық даму министрлігінің баспасөз хабарламасында.
Украинадан 130 адам үшінші эвакуациялық рейспен Нұр-Сұлтанға ұшып келді
4 наурызға қараған түні Қазақстан астанасына Украинадан үшінші эвакуациялық рейс ұшып келді. Ұшақта 133 адам болған, арасында екі нәресте бар. Барлығы 20 бала.
Астана әуежайы баспасөз қызметінің хабарлауынша, Қазақстан азаматтарын Украинадан алып келуге жіберілген үшінші борт Польшаның Катовице қаласынан Нұр-Сұлтан уақытымен сағат 21:55-те ұшып шыққан. Нұр-Сұлтанға түнгі сағат 3-терде қонған.
Қазақстан сыртқы істер министрлігінің мәліметінше, осы рейсте Қырғызстанның екі азаматы болған.
Қазақстан Ресей әскері басып кіргеннен кейін Украинада қалған азаматтарын елге эвакуациялауды жалғастырып жатыр.
Алғашқы эвакуациялық рейс 28 ақпанда кешке Алматы әуежайына қонған. Онда Қазақстанның 175 азаматы болды. 124 адам мінген екінші борт Нұр-Сұлтанға 1 наурыз кешке ұшып келді.
Қазақстанға жету үшін қазақстандықтар Киевтен елдің батысындағы Львов қаласына барып, Польшамен шекарада ұзақ уақыт кептелісте тұруға мәжбүр болған.
ПІКІРЛЕР