"Эхо Москвы" желідегі барлық парақшасын жауып, сайтын өшіретінін мәлімдеді. Бұған дейін Ресей билігі бұл медианы бұғаттап тастаған.
Ресейдің Федерация кеңесі (Ресейдің сенаты) "Ресей әскері жайлы фейк таратқандарды" қылмыстық жауапкершілікке тартып, 15 жылға дейін соттайтын заңды мақұлдады. Барлық сенатор заңды қолдаған.
Путиннің баспасөз хатшысы Дмитрий Песков брифингте Ресей Украинаны "ұлтшылдардан тазарту"* мақсатынан "бас тартпайтынын" айтты.
Песковтың сөзінше, шенеуніктер мен депутаттар санкцияға ілінсе де Путинді қолдайды. Ол Украина мен Ресей делегациясының келіссөзінде қандай да бір құжатқа қол қою туралы сөз болған жоқ деп отыр.
*Кремль Украинаға ашқан соғысын "ұлтшылдардан тазарту", "қарусыздандыру" үшін жасалған "әскери операция" деп келеді.
Украинадағы соғыстың тоғызыншы күні Ресей президенті Путин Ресейге көп шектеу салып "жағдайды ушықтырмаңдар" деп ескерту жасады. Оның үкімет жиынында сөйлеген сөзін Кремльдің бақылауындағы "Россия 24" арнасы көрсетті.
"Көршілерімізге деген жаман ниетіміз жоқ. Оларға қандай да бір шектеу еңгізбеуге, жағдайды ушықтырмауға кеңес беремін. Біз барлық міндеттерімізді орындап жатырмыз, алда да орындай береміз. Жағдайды ушықтырып, бізбен қарым-қатынасты нашарлатуға негіз көріп тұрған жоқпыз. Біз тек Ресейге қатысты теріс пиғыл болғанда ғана жауап береміз. Меніңше, қазір барлығы қарым-қатынасты жақсартуға, дұрыс әріптестік орнатуды ойлануы керек" дейді ол.
Путин бұл сөзін Батыс елдерінің Брюссельдегі жиыны қарсаңында айтты. Батыс күштері Бельгиядағы жиында Ресейге қысымды күшейту жолдарын талқыламақ.
ПІКІРЛЕР