АҚШ қорғаныс министрлігі Запорожье АЭС-інен реактивті зиянды заттар ауаға шыққан жоқ деп отыр.
Жұмаға қараған түні Ресей әскерилері Энергодар қаласындағы Запорожье АЭС-ін атқылап, бір корпусы өртенген еді. Кейін өрт өшірілген. Қазір бұл станция Ресейдің бақылауында.
Запорожье АЭС-і – Еуропадағы ең ірі атом станциясы саналады. Алғашқы блогы 1984 жылы желтоқсанда, алтыншысы 1995 жылы іске қосылған.
Британиялық ВВС медиасы Ресей аумағынан кетіп, тек сырттан хабар тарататынын мәлімдеді. Бұған дейін Ресей ВВС сайттарын бұғаттаған.
Ресейлік "Новая газета" басылымы Ресейдің Украинадағы соғысы жайлы барлық мақала, контенттерін алып тастайтынын мәлімдеді.
"Ресейдегі әскери цензура жаңа фазаға көшіп, басылымды бұғаттау мен жабудан енді журналистер мен азаматтарды қылмыстық қудалауға өтті" деп мәлімдеді газет редакциясы.
Бүгін Ресейдің Федерация кеңесі (Ресейдің сенаты) Украинада жүрген "Ресей әскері жайлы фейк таратқандарды" қылмыстық жауапкершілікке тартып, 15 жылға дейін соттайтын заңды мақұлдады. Барлық сенатор заңды қолдаған.
Сарапшылар Ресей билігі өзінің ресми ақпараттарына сай келмейтін кез келген ақпаратты "фейк" деп танып, авторларын саоттауы мүмкін деп қауіптенеді.
Ресей мемлекеттік думасының спикері Вячеслав Володин Украина президенті Владимир Зеленский Украинадан кетіп қалды дейді. Ал Украина Жоғарғы радасы Зеленский Киевте екенін айтады.
Зеленскийдің кеңесшісі Михаил Подоляк баспасөз мәслихатында Украина президентінің қайда екенін айтпады.
"Біздің президент қазір әлемде нөмері бір. Оның қауіпсіздігі жайлы ештеңе растамаймын да, жоққа да шығармаймын" деді ол.
Бүгін, Украина президентінің баспасөз хатшысы Сергей Никифоро Зеленскийдің Киев түбіндегі саяжайынан ракета сынықтары табылғанын хабарлады.
Зеленскийдің өзі бұл ракета жайлы "мүлт кетті" деген.
Бұған дейін The Times соғыс басталғалы Зеленскийге қастандық жасауға үш рет әрекет болғанын жазған.
ПІКІРЛЕР