Ұлыбритания халқы Украинаға гуманитарлық көмекке 55 миллион фунт жинаған
Ұлыбритания төтенше жағдайлар жөніндегі комитеті (зардап шеккен адамдарға шұғыл көмек көрсетумен айналысатын қоғамдық ұйым) Украина азаматтарына көмекке бір күнде 55 миллион фунт жиналғанын жариялаған. Бұл туралы ВВС хабарлады. Жәрдем бергендер арасында Ұлыбритания патшайымы екінші Елизавета, Чарль ханзада және король отбасының өзге де мүшелері бар. Британ үкіметі 20 миллион фунт бөлген.
Ресей басқыншылық жасаған Украинадан қашқан Шыңжаң қазағы Еуроодақ аумағына өтті
Қытайдың солтүстік-батысындағы Шыңжаң өлкесінен қашып, Еуроодаққа ұмтылған, былтыр бірнеше ай Украинадағы көші-қон орталықта қамауда болған Қытай қазағы Ерсін Еркінұлы негізінен әйелдер мен балалардан тұратын мыңдаған босқынмен бірге Украина шекарасынан Польшаға өткенін айтты.
4 наурызда Азаттық тілшісімен сөйлескен ол Украинадан Польшаға өткен босқындар арасында шетел азаматы көп екенін айтқан. Поляк жағы келгендерді түрлі орындарға, соның ішінде сауда орталықтарына орналастырып, азық-түлік, киім-кешекпен, өзге де қажет заттармен қамтамасыз еткен.
Украин шекарашалары Еркінұлын 2020 жылы қазанда Польша шекарасын құжатсыз кесіп өтпек болған кезде ұстаған. Сол жылы желтоқсанда елдің батысындағы Львов қаласы апелляциялық соты оны Қытайға депортациялау туралы төменгі сот инстанциясы шығарған шешімнің күшін жойған.
2021 жылы тамызда Украина шекарасынан заңсыз өтпек болған Ерсін Еркінұлын Словакия шекарашылары ұстап, Украинаға қайтарған. Одан кейін Львовтағы көші-қон орталығына орналастырған.
Қытай берген құжатын жоғалтып алғанын мәлімдеген Еркінұлы өзін Қытайға беретін болса, ол жақта түрмеге қамап, азаптайтынын айтқан. Ақыры украин билігі оған елде қалуға рұқсат берген.
Кейінгі жылдары Қытайдың Шыңжаң өлкесінде тұратын ұйғыр, қазақ және өзге де байырғы ұлт өкілдері (негізінен мұсылмандар) биліктің қысымы мен қудалауы күшейгенін айтып, кейбірі өзге елдерге қашты.
БҰҰ, АҚШ пен өзге де батыс елдері Қытай билігі арнайы "лагерьлерде" Шыңжаңдағы миллионға жуық байырғы ұлт өкілдерін мәжбүрлеп, еркінен тыс ұстап отыр деп мәлімдеген.
Пекин ондай айыптауларды үзілді-кесілді жоққа шығарып, лагерьлерді "экстремизммен күресетін орталықтар" және "кәсіп үйрететін" мекемелер деп атаған.
Қазақтар Шыңжаңды байырғы кезден мекендейтін түркітілдес ұлттар арасында саны жағынан ұйғырлардан кейін екінші орында тұр. Сонымен бірге аймақта қырғыз, тәжік, дүнген және өзге де мұсылмандар тұрады.
НАТО Украинаға қарулы күштері мен әскери ұшақтарын жібермейді
НАТО Украинаға әскері мен әскери ұшақтарын жібермейді. Мұны ұйымның бас хатшысы Йенс Столтенберг 4 наурызда Брюссельде НАТО елдері сыртқы істер министрлерінің жиынында айтты.
Солтүстікатлантикалық одақ Ресеймен соғысқа ұмтылмайды, егер ол Украинадағы соғысқа тікелей араласса, сондай қауіп туындауы мүмкін деп мәлімдеді Столтенберг.
Бұған қоса ол Ресейді Украинадан әскерін шығарып, келіссөз бастауға үндеді. Егер Ресей қақтығыс аумағын кеңейтіп, Украинадан тыс аумақ жерде соғысуға тырысса, ұйым өзін-өзі қорғайды деді НАТО бас хатшысы.
Столтенберг кездесу кезінде Киевтің Украинада "ұшпайтын аймақ қалыптастыру" (яғни, Украинаның әуе кеңістігіндегі ресейлік ұшақтар мен зымырандардың барлығын атып түсіру) туралы ұсынысы талқыланғанын растады. Бірақ НАТО елдері «қақтығыс ушығып кетпес үшін» мұндай ұсыныстан бас тартқан.
Столтенберг алдағы күндері Украинада жағдай одан сайын ушығуы мүмкін деп топшылайды: адам шығыны көбейіп, көп нысандар қира-бүлінеді дейді ол.
Украина президенті Владимир Зеленский жұма күнгі кезекті видеомәлімдемесінде НАТО-ны "әлсіздік танытты" деп кінәлап, ұйым мүшелері арасында бірлік жоқ деп мәлімдеді.
НАТО елдерінің басым бөлігі Украинаға қару-жарақ тасымалдайды. Еуроодақ Украинаға қару-жарақ жеткізу үшін ірі көлемде қаржы бөлді. Бірқатар ел өз азаматтарына Украинадағы шетел легионы құрамында Ресейге қарсы соғысуға рұқсат берді.
Ресей Украинаға 24 ақпаннан бастап басып кіре бастаған. Ресей президенті Владимир Путин өзге мәселелермен қатар НАТО Украинаны Ресейге қарсы қорғаныс шебі жасамақшы болғанын айтқан. Ал мемлекеттік дума жетекшісі Вячеслав Володин Ресей ескертіп соққы берді десе, Украина мен НАТО мұны терістейді.
БҰҰ комиссиясы Украинадағы әскери қылмысты тексереді
БҰҰ Адам құқықтары жөніндегі кеңесі Ресей күштерінің Украинадағы "әскери қылмысын" тексеретін халықаралық комиссия құрады. Бұл жөнінде Reuters хабарлады.
Ресей әрекетін айыптайтын және комиссия құруды көздейтін резолюцияны кеңеске мүше елдердің басым бөлігі қолдады. Ресей мен Эритрея ғана қарсы болды.
Ресей делегаты резолюция жақтастары "Украинада болып жатқан жағдайға Ресейді айыптау үшін барлық амалды пайдаланып отыр" деп мәлімдеді.
Украина президенті Владимир Зеленский БҰҰ Адам құқықтары кеңесінің шешімін құптады.
Комиссияның қалай құрылатыны әзірге белгісіз.
Бұдан бұрын халықаралық Гаага соты Украинада соғысып жатқан тараптар жасауы мүмкін әскери қылмыстарға байланысты істі қарай бастаған.
Ресей билігі әскерилер азаматтық нысандарды атқылаған жоқ және бейбіт тұрғындар өмірін сақтап қалуға тырысып жатыр деумен келеді. Ресей Украинаға соғыс бастаған 24 ақпаннан бері Украинада азаматтық нысандар, оның ішінде тұрғын үйлер мен мектептердің қирағаны жөнінде көптеген айғақ жарияланды. БҰҰ есебінше, шабуыл салдарынан опат болған бейбіт тұрғындар саны жүзден асады.
ПІКІРЛЕР