Шекара түбіндегі Ресей әскерінің 95 пайызы Украинаға кірді
Ресей мен Беларусьтің Украинамен жапсарлас аймақтарына шоғырландырылған Ресей әскерінің 95 пайыздайы Украинаға кірді. Бұл жөнінде Washington Examiner басылымы хабарлады. Басылымның жазуынша, 7 наурызға қараған түні АҚШ қорғаныс министрлігінің брифингінде осындай дерек айтылған.
Украина шекарасының түбіне топтастырылған 170 мыңдай Ресей сарбазының 95 пайыздайы Украина жерінде, демек ел аумағына енбеген 9 мыңдай ғана сарбаз қалған. 4 наурызда Пентагон Украинаға шекара түбіндегі Ресей әскерінің 92 пайызы кірді деп хабарлаған.
Пентагонның мәліметі бойынша, «аймақтардағы жағдай көп өзгермеген», Ресей әскері Украинаның «солтүстігі мен шығысында Киев, Харьков және Чернигов қалаларына жақындап, оларды оқшаулауға күш салды, Украина табанды қарсылы көрсетті».
Пентагонның мәліметі бойынша, 2014 жылы аннексиялаған Қырым түбегінде қалыптастырған инфрақұрылымының арқасында Ресей оңтүстікте біраз ілгері жылжыған. Оқ-дәрі мен жағармай жақын жерден жеткізілетіні де көмектессе керек.
Соғыс басталғалы Ресей 600-дей зымыран тастаған.Шек
Омбудсмен: "ЛХР" төңірегіндегі елдімекен халқынан Украина паспортын күшпен алып жатыр
Ресейдің Украинаға шабуылы басталғалы 10 күн ішінде бір жарым миллион адам босып кетті. Бұл туралы БҰҰ Босқындар ісі жөніндегі жоғарғы комиссары мәлімдеді. Филиппо Грандидің сөзінше, бұл "Екінші дүниежүзілік соғыстан кейін Еуропада алғаш болып отырған миграциялық дағдарыс".
Украина Жоғарғы радасының адам құқығы жөніндегі өкілетті өкілі Людмила Денисова өзін "ЛХР" деп жариялаған сепаратистік құрылым "Ресей шабуылынан кейін бақылауына алған елдімекен халқынан Украина паспортын күшпен тартып алып жатыр" деп хабарлады. Денисованың сөзіне қарағанда, "ЛХР "оларға Ресей паспортын алуға мәжбүрлегісі келеді. Бұл ақпаратты растайтын өзге мәліметтер әзірге жоқ.
Мариуполь қалалық кеңесі гуманитарлық дәліз жұмысын жалғастырып, халықты Запарожьеге эвкауациялай бастағанын айтты. Эвакуация 5 наурызда тоқтап қалған. Оған Украина мен Ресей бірін бірі кінәлаған.
Владимир Путиннің бұйрығымен Ресей әскері 24ақпанда Украинаға басып кірген еді.
Халықаралық "Шекарасыз дәрігерлер" ұйымы жылу, су, электр қуаты ажырап қалған Мариупольдегі жағдайды "апат" деп бағалаған.
Ресейдің байланыс, ақпараттық технология және бұқаралық коммуникация саласын бақылау жөніндегі федералдық қызметі ("Роскомнадзор") медиаресурстарды әлі де жаппай бұғаттап жатыр. 6 наурызда мекеме "Эхо Кавказа" (Азаттық радиосының жобасы), "Сноб", "Собеседник", "Агентство", "Эхо Москвы в Челябинске" басылымдарының сайттарын және Ресейдің біраз аймақтық ақпарат құралын, Украинаның бірнеше ресурсын ашылмайтын етіп тастады. Мұны бұғатталған сайттар тізімін жасап жатқан "Роскомсвобода" құқық қорғау жобасы хабарлады.
"Медиазонаның" дерегі бойынша, бұғатталған сайттар арасында азаматтық белсенділер туралы мәлімет беретін Activatica мен Калифорниядағы орыс диаспорасының SlavicSac сайты бар. Ресей бас прокуратурасының 24 ақпандағы талабы негізінде ел аумағында бұл сайттарға шектеу қойылды.
5 наурызда осы мекеменің талабымен оншақты басылым, соның ішінде Азаттық радиосының жобалары: "Север.Реалии", "Сибирь.Реалии", "Кавказ.Реалии", "Idel.Реалии", "Фактограф", "Маршо Радио" және "Азатлык" ашылмай қалған.
7 наурыз таңертеңге не белгілі?
- Ресей Украинаның түрлі қалаларын әуеден шабуылдап жатыр. Елге басып кірген Ресей әскері мен украин сарбаздары арасында ұрыс толастаған жоқ.
- Харьковке әуеден шабуыл жасалып, Одесса облысының Тузлы елдімекеніне зымыран атылғаны хабарланды.
- Чернигов облысының орталығы Чернигов қаласындағы бейбіт халық тұратын ауданға бомба түсіп, 40-тан аса адам қаза тапты. Житомирде лицей қирады. Киев түбіндегі Мархалевка ауылында әуе шабуылы кесірінен алты адам көз жұмды.
- БҰҰ-ның хабарлауынша, Ресей шабуылы басталғалы Украинадан миллионнан астам адам босып кеткен.
- ЕҚЫҰ-ның арнайы мониторинг миссиясы Украинадан кететінін хабарлады.
- Anonymous хакерлері Ресейдегі "Россия 24", "Первый канал", "Москва 24" бірнеше телеарналарының сайтын бұзып кіріп, тікелей эфирде Украинаға шабуыл туралы «Настоящее время» арнасының репортажын көрсеткенін хабарлады.
- Netflix Ресейдегі жұмысын тоқтатты, ал TikTok ресейлік қолданушылардың жаңа видео жариялап, стрим жүргізуіне тыйым салды. Spotify Ресейдегі премиум-жазылымға тыйым салды.
- «Роскомнадзор» медиаресурстарды әлі де жаппай бұғаттап жатыр.
ПІКІРЛЕР