Киевке қарай Ресейдің әскери техникалары жылжып барады
Беларусь шекарасы жақтан ресейлік әскери техникалардың ұзын колоннасы Киевке қарай кетіп барады. Maxar компаниясы спутниктен түсірген суреттерді жариялап, колонна 65 шақырымға жететінін мәлімдеді. Мына суретте сол колоннаны көре аласыз.
Вашингтон Ресей Украина астанасына екінші екпінмен тағы да шабуыл жасамақ деді.
Колонна ішінде бронетехникалар, танкілер, артиллерия, әскерилер мінген және бензин бактары тиелген жүк көліктері бар.
Америкалық сенатор Крис Мёрфи Конгресс мүшелерінің жабық брифингінен кейін твиттерде "осы аптада ресейлік әскерилер Киевті қоршауға тырысады" деп жазды.
"Қала үшін шайқас ұзақ әрі қанды болады, украиналықтар соғысқа тез дайындалып жатыр" деді ол.
1 наурызға қараған түні ресейлік әскерилер Украинаның оңтүстігіндегі Херсон қаласына шабуылдап, қоршады. Бірақ қала украиналық әскерилер мен әкімшіліктің бақылауында екені хабарланды.
Украинадағы соғыста кемінде бір Ресей қазағының опат болғаны хабарланды
Украинадағы соғыста Ресейдің Краснояр өлкесі Астрахань облысының тумасы Арман Нарынбаев қаза болған. Бұл жөнінде өлке губернаторы Игорь Бабушкин Инстаграм парақшасында хабарлады.
Бұл - төменгі Еділ бойын мекендеген халық арасында соғыста қаза болғаны ресми түрде расталған алғашқы мәлімет. Бұған дейін жергілікті чаттар мен әлеуметтік желілерде Астраханнан барған солдаттардың қаза болғаны жайлы мәліметтер тараған. Володар ауданы (Астрахань облысындағы елді мекен - ред.) тұрғындарының бірінің сөзінше, бұл жаққа алты мәйіт жіберілген. Астрахань облысында негізінен қазақтар тұрады.
Азаттықтың Орыс қызметінің тілшісі Тодар Бақтемір Twitter'де соғыста тағы бірнеше қазақ қаза болуы мүмкін екенін, әзірге ресми түрде расталмағанын жазды. Оның айтуынша, ақпараттың ресми түрде расталмауына Нарынбаевтың офицер болғаны, ал қаза болған өзге қазақтардың "әскери салада тәжірибесі жоқ, Украинаға заңсыз жіберілгені" себеп болуы мүмкін.
"Қаза болған солдаттардың туыстары қысымға ұшыраған, сөйлеуден қорқады" деп жазды журналист.
Ресей спорты да қыспақта қалды
- Халықаралық олимпиада комитеті спорт федерацияларына Ресей мен Беларусь спортшыларын жарыстарға қатыстырмауға шақырды.
- Халықаралық футбол федерациясының (ФИФА) кеңесі мен Еуропа футбол одағының (УЕФА) атқарушы комитеті Ресейдің Украинаға соғыс ашқанына байланысты осы елдің құрамасы мен клубтарын барлық жарыстан шектеді. Польша, Чехия, Швеция биыл қыста Катарда болатын футболдан әлем чемпионатының іріктеу жарысында Ресеймен ойнаудан бас тартқан еді.
- Халықаралық шайбалы хоккей федерациясы (IIHF) Ресей мен Беларусь құрамасын барлық жарыстардан шеттетті.
- Халықаралық коньки спорты федерациясы (ISU) Ресей мен Беларусьті мәнерлеп сырғанау, шорт-трек, коньки жарыстарына қатыстырмайды.
- Халықаралық гандбол федерациясы да Ресейді жарыстарға қатысу құқығынан айырды.
- Әлемдік таэкондо федерациясы Ресей президенті Путиннің қара белбеуін қайтарып алды. Халықаралық дзюдо федерациясы Путинді құрметті президент атағынан айырды.
- Футболдан Чемпиондар лигасының мамырда Санкт-Петербургте өтуі тиіс финалы Парижге ауысты.
- Формула-1 автожарысының Сочидегі кезеңі де өтпейді. Халықаралық керлинг федерациясы қарашада Ресейде өтуі тиіс Еуропа чемпионатын басқа елге ауыстырады
Ұлыбритания қорғаныс министрлігінің барлауы:
"Кейінгі 24 сағатта Ресейдің Киевке жорығында жетістікке жете қойған жоқ. Шамасы, бұл – логистика қиындықтарының нәтижесі.
Ресей күштері Киевтің солтүстігіне, Харьков пен Чернигов маңына артиллериялық шабуылды үдетті. Ауыр артиллерияны халық тығыз орналасқан жерде қолдану бейбіт тұрғандардың қаза табуы ықтималдығын едәуір арттырады.
Ресей Украина әуе кеңістігін бақылауға алуда сәтсіздікке ұшырап, шығынына азайту үшін түнгі операцияларға ойысуға мәжбүр".
ПІКІРЛЕР